Namatay ang usa ka 11-anyos nga batang lalaki sa Ontario, Canada, tungod sa rabies pipila ka semana human siya ma-expose sa kabog samtang natulog sa usa ka payag, sumala sa Canadian Medical Association Journal.
Matod sa report, nahitabo ang insidente sa ting-init sa 2024, dihang ang usa ka kabog mitugpa sa nawong sa bata samtang siya natulog. Giabog niya kini, ug gidakop dayon sa iyang amahan ang hayop ug dayon gibuhian.
Tungod kay walay klarong pinaakan o makita nga samad, wala sila midangop dayon sa ospital ni wala usab nagpa-bakuna batok sa rabies.
Mga tulo ka semana ang milabay, nagsugod og sintomas ang bata, lakip ang pagkamanhid sa nawong, pagkawala sa gana sa pagkaon, ug paghubag.
Sa pagdagan sa mga adlaw nigrabi ang sakit, miabot kini sa grabe nga kahimtang nga naglakip sa kalisod sa pagtulon, kalibog, halusinasyon, ug sobra nga paglaway.
Gikompirma sa mga doktor nga rabies ang hinungdan sa iyang kondisyon.
Bisan pa sa intensive medical care, namatay ang bata 17 ka adlaw human siya ma-admit sa ospital.
Kini ang unang natala nga kaso sa rabies sa Ontario sukad pa niadtong 1967.
Nagpasidaan ang mga eksperto nga ang rabies halos kanunay makamatay kung magsugod na ang sintomas, apan mapugngan kini pinaagi sa dayon nga post-exposure vaccination human sa posibleng exposure sa hayop nga adunay rabies.
Gipahimangnoan usab nga bisan walay makita nga pinaakan, kinahanglan gihapon mangayo og medikal nga tabang kung adunay direktang kontak sa kabog, kay posibleng adunay gagmay nga pinaakan nga dili dayon makita.
