CEBU CITY-Makadawat og school supplies ang gibanabanang 120,000 ka mga tinun-an sa pampublikong tunghaan sa elementarya sa dakbayan sa Sugbo, gikan sa kagamhanan sa dakbayan sa Sugbo.
Kini ang gipahibalo ni Acting Mayor Raymond Alvin Garcia nga sugdan karong Biyernes, Agusto 2, ang pagpang-apod-apod sa mga school supplies, nga maglakip sa bag, lapis, notebook, papel, ug uban pa, ngadto sa mga tinun-an sa 80 ka mga barangay sa dakbayan.
Apan, dili ra karong Biyernes dayon humanon ang pagpanghatag ngadto sa 120,000 ka mga tinun-an kundili buhaton kini sulod sa 30 ka mga adlaw.
Gidugang niini, nga sa niaging abli sa klase pa unta ipanghatag ang mga bag ug school supplies apan tungod sa kalangay sa proseso sa pagpalit karon nalang kini madayon.
Giklaro sa acting mayor nga alang lang ang school bag ug supplies sa mga tinun-an sa elementarya sa pangpublikong mga tunghaan ug walay labot ang anaa sa pribadong mga tunghaan.
