CEBU CITY-Naangol ang 15 ka mga pasahero human nga natuwad ang gisakyan niini nga pickup sa national road sa Barangay Talo-ot, lungsod sa Argao, kaganihang buntag.
Gisaysay ni Patrolman Jess Peretso sa Argao Police Station nga nawagtangan ug brake ang sakyanan nga gimaneho ni Bernabe Aballe, 46 anyus ug taga Barangay Butong, Argao, hinungdan nga iyaha kining gibangga sa kilid sa dalan.
Matud pa nga paingun unta kini sila sa lungsod sa Sibonga arun nga ihaklad ang mga paninda sa tabo sa maong lungsod sa dihang nahitabu ang aksidente.
Dali nga gidala sa Argao District Hospital ang 12 ka mga pasahero, samtang ang tulo niini ang gidala sa Vicente Sotto Memorial Medical Center dinhi sa dakbayan sa Sugbo.
Sila si Lilia Paquesa, 62 anyus, Angela Templa, 50 anyus, ug Mariel Alqade, 28, pulus taga Barangay Bayabas, lungsod sa Argao, ang gidala sa VSotto gumikan sa grabi nga samad nga ilahang naangkun.
Hinu-un, gitataw ni Patrolman Peretso nga mi-abaga lang ang drayber sa galastuhan sa tambalanan. (SBR)
