CEBU CITY – Mikabat sa 19 ka mga ampules sa nubain nga gisuksok sa pan ang nasakmit sa mga jail guards sa Cebu City Jail gikan sa usa ka babayeng dalaw.
Ang suspek naila nga si Mary Ann Abellanosa Labita.
Gibutyag ni Jail Senior Insp. Bryan Roy Mercado nga moduaw unta si Labita sa ka-live in niini nga anaa sud sa bilangguan.
Apan sa gipahigayong inspeksyon sa mga jail guards sa dala sa suspek, nabantayan nga adunay hiwa ang mga pan hinungdan nga giablihan ug gipikas ang pan ug dinhi nakita sa mga jail guards ang 19 ka mga ampules sa nubain diin 18 niini ang intact ug nabuak ang usab ang usa.
Hugot nga gihimakak sa suspek nga gikan kaniya ang nubain ug matud niya nga giingong gisugo lang siya sa gawas nga dad-on ang mga pan sa sulod sa bilangguan bugti sa suhol nga P1,000.
Sa pagkakaron nakadetain na si Abellanosa sa Police Station 9 sa Cebu City Police Station (CCPO).
Samtang sa padayon usab ang imbestigasyon sa mga otoridad sa usa pa ka babayeng dalaw sa nahisgutang bilangguan sa Female Dormitory nga nakuhaan sa mga jail guards ug gagmayng pakete sa gituohang shabu kaganiha gihapong buntag.
