Anaa na sa maayong kahimtang ang panglawas sa usa sa duha ka mga propsmen sa Carcar City Sinulog Contingent human kini naaksidente sa kadalanan sa Lawaan 3 sa dakbayan sa Talisay niadtong Martes, Enero 20, 2026.
Sumala sa pakighinabi sa Bombo Radyo Cebu News Team kang Jonathan “Joy” Tumulak, ang pangu sa City of Talisay – Traffic Operations & Development Authority (CT-TODA) sa saysay niini nga ang duha ka mga naangol kay anaa na sa normal nga kondisyon human nakahiagom ang usa og pagkaangol sa ulo ug ang laing duha kay nabalian sa bukog sa wala nga bukton.
Kahinumduman nga ang insidente naglangkob sa dumptruck nga iya sa dakbayan sa Carcar nga nagkarga sa mga props sa pasundayag sa contigent sa dakbayan niadtong Enero 18 sa Sinulog sa syudad sa Sugbo.
Kun diin nabuy-od sa mga wire sa poste ang duha samtang nagbyahe sa kadalanan sa dakbayan sa Talisay. Ang 50-anyos nga drayber kay nahimong emosyonal sa panghitabo nga sa pagkakaron kay wala na kini gi-hold sa CT-TODA tungod kay ang pamilya sa mga biktima wala nagpasaka og reklamo mahitungod sa aksidente.
