MANDAUE CITY,CEBU- Patay ang duha samtang laing usa ang kritikal sa nahitabong aksidente sa kadalanan sa B. Suico St., Barangay Tingub, dakbayan sa Mandaue niadtong adlawng Sabado, Abril 11, 2026.
Naglambigit ang aksidente sa usa ka trailer truck og duha ka motorsiklo diin lakip sa naguba sa maong panghitabo ang usa ka panimalay nga iya ni Edgardo Mercado de Guzman.
Giila ang mga biktima sa paghitabo nga sila si; Marvin Ocampo Dayuha, 38-anyos, drayber ug si Adeline Mediana, 34-anyos, lumulupyo sa susamang dapit nga sakay sa ilang motorsiklo. Samtang sa laing motor nga usa ka scooter-type kay sila Larry Juan Bahita, 30-anyos ug si Marilyn Cuambot, 37-anyos nga pulos taga-Canduman, Mandaue City.
Nailhan usab ang drayber sa trailer truck nga si Teodie Punay Ycot, 36-anyos nga lumulupyo sa Purok 1, Barangay Consolacion sa lungsod sa Dalaguete sa habagatang Sugbo.
Base sa inisyal nga imbestigasyon sa Mandaue City Police Office (MCPO) pinaagi sa esklusibong pakighinabi sa Bombo Radyo Cebu News Team kang Spokesperson Police LtCol. Mercy Villaro-Kantuna nga gikabutyag nga ang trailer truck padulong unta sa dalan M. Ceniza apan sa higayong muliko na kini patuo kay nipalyar ang brake niini hinungdan nga nikalit lang kini og atras nga nakaigo sa duha ka motorsiklo ug usa ka panimalay sa maong dapit.
Miresulta ang panghitabo sa grabeng pagka-angol sa mga sakay sa motorsiklo diin ang duha ka ang kay nasutang dead-on-arrival sa dihang gidala na kini sa tambalanan samtang ang drayber nga si Marvin Dayuha kay kritikal pa ang kahimtang ug luwas ra si Larry Bahita kay nakalayat kini atol sa dayong pag-atras sa trailer truck.
