3 ka classrooms ug 6 sa panimalay, naugdaw atol sa sunog sa Sapangdaku, dakbayan sa Sugbo

CEBU CITY-Naugdaw ang 3 ka mga classrooms sa Sapangdaku Elementary School ug laing 6 ka mga silingan nga mga panimalay atol sa nahitabong sunog sa Sitio Riverside, Barangay Sapangdaku, sa bukirang bahin sa dakbayan sa Sugbo kagahapong adlawa sa Biyernes, Hulyo 26, 2024.

Nahitabo ang maong sunod alas 4:02 sa hapon nga subay sa imbestigasyon sa kabumberohan sa dakbayan nga nagsugod sa panimalay ni Marissa Vergara og daling mikaylap sa mga silingan apil na ang tupad nga tunghaan sa elementarya.

25 ka mga indibidwal sulod sa 5 ka mga pamilya ang hilabihang naapektuhan sa maong sunog.

Hinuon walay naangol sa naasoy nga sunog apan mukabat ang balor sa danyos niini sa kapin 750,000 pesos sulod sa 30-minutos nga insidente.