CEBU – Tulo ang kumpirmadong patay samtang 15 ang naangol dihang gidaro sa trak ang usa ka van, alas 11:15 sa gabii, Biyernes, Marso 18, sa National Highway, Brgy. South Poblacion, Jimalalud, Negros Oriental.
Giila ang mga namatay nga mao sila si Erodetha Gacang, 67; Roel Gacang, 62; ug Elizar Pontillano, 68.
Base sa impormasyon nga nakuha sa kapulisan, paingon sa south bound area ang Fuso Cargo Truck nga dunay plate number CAA 5074 nga gimaneho ni Marcos Alberastinni, 40, residente sa Brgy. Poblacion, Guihulngan City ug pag-abot niini duol sa Jimalalud Rural Health Unit, giingong nidiretso ang trak sa kurbada hinungdan nga nadaro niini ang van nga adunay plate number FAG 5420 nga gimaneho ni Jony Larano, 33, taga Saturn Village, Handumanan, Bacolod City.
Giingong paingon sa norte ang van nga adunay kargang 26 ka pasahero lakip na ang driver niini.
Daling niikyas ang drayber sa trak human sa hitabo apan pinaagi sa tabang sa mga tawo nga niagi sa lugar nga nahitaboan, nasakpan ang drayber nga giingong nitago sa kanal.
Kasong reckless imprudence resulting to multiple homicide, physical injury and damage to property ang atubangon sa drayber kinsa anaa karon sa kustodiya sa Jimalalud Police Station.
