BOLJOON, CEBU- Nakasinati og sakit sa tiyan ang 33 ka mga tawo human sila nakakaon sa mga pagkaong gi-andam sa usa ka kalihokan nga gipahigayon sa Department of Agriculture sa Brgy. San Antonio, Boljoon Cebu, niadtong Merkules, Abril 23, 2025.
Atol sa ikslusibong pakighinabi sa Bombo Cebu Newsteam kang Eutimio Ternate, pangu sa Municipal Disaster Risk Reduction and Managment Office sa Boljoon, iyahang gisaysay nga aduna silay kalit nga report nga nadawat, kagahapon Abril 24, kabahin sa maong panghitabo, kay ang maong mga biktima, nakasinati na og dili normal nga pagpagawas sa hugaw, ug gisakitan na kini sa ilahang tiyan.
Busa dali nga niresponde ang “agency emergency operation reponders”, aron madali og dala sa tambalanan ang maong nagkalain-laing indibidwal.
Matod pa ni Ternate, ang maong pagkaon gi-andam sa mga facilitators sa maong kalihokan, nag-gikan sa usa ka catering sa Lungsod sa Dalaguete. Diin, ilahang pangagpas nga nadaot na kini gumikan sa taas nga oras sa pagbyahe gikan sa Dalaguete paingon sa naasoy nga Barangay.
Sa pagkakaron, anaa na sa luwas nga kahimtang ang maong mga indibidwal kay aduna kini mga “medication” nga gihatag, ug luwas ra usab nga nahatud sa mga personnel sa munisipyo sa ilahang tagsa-tagsa ka panimalay. (BOMBO IRENE ARDIENTE)
