Niabot na sa kapin sa P37M ang kinatibuk-ang kantidad sa hinabang gikan sa Department of Social Welfare and Development (DSWD) alang sa mga pamilya nga padayon nga naapektuhan sa hiniusang epekto sa Typhoon Crising ug southwest monsoon.
Matod ni Assistant Secretary Irene Dumlao sa DSWD Disaster Response Management Group, ang hinabang naglangkob sa 53,383 ka family food packs, ready-to-eat food, ug non-food items nga gihatud dayon ngadto sa mga komunidad nga apektado sa kalamidad.
Basi sa report sa DSWD-Disaster Response Operations Management, Information and Communication (DROMIC), kapin sa 151,000 ka pamilya o 523,686 ka indibidwal gikan sa 1,134 ka barangay ang naapektuhan sa bag-o lang nga kalamidad.
Gikan sa kinatibuk-ang ihap sa mga apektadong pamilya, kapin sa 9,000 ka pamilya o 33,608 ka indibidwal ang temporaryong nagpuyo sa 407 ka evacuation centers.
Dugang pa ni Dumlao, ang departamento padayon nga nakig-alayon sa mga local government units (LGUs) aron mahatud dayon ang mga hinabang.
Subay niini, ang padayong pag-apud-apod sa mga hinabang giubanan sa walay hunong nga produksyon sa food packs sa DSWD National Resource Operation Center (NROC) sa Pasay City ug Visayas Disaster Response Center (VDRC) sa Mandaue City, Cebu.
Ang DSWD nag-andam og halos P3B nga kantidad sa relief supplies ug stand-by funds nga magamit sa nagpadayon nga disaster response operations.
