CEBU CITY-Patay ang 4-anyos nga batang lalaki human kini nadat-ugan og railings sa Pasil Fish Port, Barangay Suba ning dakbayan sa Sugbo.
Nakuhaan sa CCTV footage ang maong insidente, pasado alas 4 sa hapon niadtong Oktubre 14, 2024.
Nakita sa CCTV footage nga ang biktima nagsandig og nag barug sa railings nga anaa sa naasuy nga dapit samtang adunay laing bata nga lalaki nga maoy nikatkat sa railings ug niambak paingun sa luyo nga bahin.
Pila ka segundo ang nilabay sa pagkanaog sa usa ka batang lalaki kalit lang natumba ang maong railings ug natumba sa biktima.
Daling gidala sa tambalanan ang biktima apan nakabsan kini gahapon sa buntag, Oktubre 15.
Mihatag dayon og tabang ang Kagamhanan sa Dakbayan sa Sugbo human naabot sa City Hall ang nahitabo sa bata, nga nadali pa og dala sa duha ka mga tambalanan apan nakabsan gayud sa kinabuhi.
Diin gipangunahan ni Portia Basmayor, ang labaw sa Department of Social Welfare and Services (DSWS), ang pagbisita sa haya sa bata sa Brgy. Suba ug nitunol sa pamilya og P10,000.
Ingon man nga ang City Hall na ang niabaga sa bayranan sa nitso sa Calamba Public Cemetery ug sa lungon.
Nihatag usab ang DSWS og duha ka sako nga bugas ug duha ka karton nga canned goods nga gamiton alang sa haya sa bata.
Si Basmayor mismo ang nangunay sa pag-asikaso sa mga tabang nga kinahanglanon sa pamilya sa bata.
Kabahin sa bayranan sa tambalanan sa bata, gilihok na sab niya nga ang City Hall na ang bahala niini.
Hatagan usab og pagtagad sa DSWS and bata nga maoy hinungdan nga natumba ang railing kay gikaingon nga apektado usab sa panghitabo.
Samtang, gihatagan og katin-awan ni Raquel Arce, ang head sa CCTO nga walay kamatuoran ang pangangkon sa uyoan sa 4-anyos nga batang nadat-ugan og railings niadtong Oktubre 14.
Matud ni Arce nga gipasaylo ug gisabot ang nagmaniho sa e-bike gumikan kay gahatod kini og pasyente paingon sa tambalan ug gipahimangnoan nga dili na mobalik gumikan kay gidili ang pag-agi sa e-bike sa naasoy nga dapit.
Apan, mibalik ang e-bike nga gimaniho og lain diin naghatod kini og laing pasahero ug mibutyag sa susamang rason nga may kalabutan sa emerhensiya.
