CEBU CITY-Midangop sa Mabolo Police Station sa Cebu City Police ang usa ka inahan human kini naka-angkon og “blackeye” tungod gisumbag sa iyang kaugalingong anak niadtong Pebrero 16, 2025.
Ang biktima kay giilang si Gina Oto, 45-anyos nga lumulupyo sa Sitio Cabungahan sa Barangay Busay ning dakbayan sa Sugbo tungod gisumbag kini sa anak dili lang kausa apan sa katulo nga higayon.
Samtang ang suspek kay giilang si Djay Oto, 24-anyos, walay trabaho nga aduna nay kapuyo ug duha ka anak nga mulupyo sab sa samang dapit.
Matod pa sa kapulisan nga gusto sa inahan nga ipadakop ang iyang anak tungod sa insidente sa pagpanumbag nga diay mao kini ang ikaduhang panghitabo sa pagpangdapat.
Sa pakigsubay kay ang hinungdan sa lalis sa mag-inahan kay nasuko ang anak tungod gikasab-an sa inahan kay gibiyaan og kalit ang iyang masuso nga bata sa ilang balay aron mulakaw para makigkita sa kapuyo nga anaa sa Cebu IT Park.
Hinungdan ang nangasaba ang inahan og nganong gibiyaan kini iyang apo nga namugnaw nalang tungod nakaatubang sa labyog sa hangin sa electric fan nga pwerteng hilak sa bata pasado alas 10 sa Sabado sa gabii.
Buntag na sa adlawng Dominggo nakauli ang dinakpan nga impluwensyado pa sa ilimnong makahubog nga imbes magpasalamat kay nangulata sa inahan kung ngano daw magbuot kini sa pagpadako sa iyang bata.
Kasamtangang anaa na sa kustodiya sa Mabolo Police Station ang dinakpan samang giandam ang kasong ipasaka batok kaniya.
