CEBU CITY-Nagnegatibo ang anaa sa 51 ka mga bus ug taxi driver sa gipahigayong surprise drug test sa Cebu South Bus Terminal gahapon Martes, Oktubre 29 aron masiguro ang kaluwasan sa mga manguliay sa ilang tagsa-tagsa ka probinsiya sa umaabot nga All Saints’ Day ug All Souls’ Day.
Ang maong lakang kabahin sa Oplan Harabas: Project Undaspot sa Philippine Drug Enforcement Agency Central Visayas, Land Transportation Office (LTO-7), Land Transportation Franchising and Regulatory Board (LTFRB-7), Philippine Coast Guard (PCG-7), ug Philippine National Police (PNP); ingon man ang kagamhanan sa dakbayan sa Sugbo ug sa Cebu Provincial Government.
Sa pakighinabi sa Bombo Radyo Cebu kang Eduardo Montealto, ang Regional Director sa LTFRB 7, gipaambit niini nga ang drug test nga gipahigayon kay arun masiguro nga negatibo o wala migamit og illegal nga drogas ang mga driver ug operators.
Mao nga ang LTO-7 ug ubang ahensya anaa na sa heightened alert status.
Dugang pa niya nga walay target nga lugar ang random inspection maong lauman nga kalit lang makit-an ang mga otoridad daplin sa mga karsada.
Usa sa mga tumong usab niini kay ang pag-verify nga ang mga drayber sa public utility vehicle (PUV) nga nagpabiling nagsunod bisan pa sa mga terminal inspection.
Subay niini, gipahinumduman ni Montealto ang mga operators nga sigurohon nga anaa saktong kondisyon, ingon man ang mga units ug kon gani adunay anomalya kay dili kini padaganon arun malikayan nga adunay mahitabo nga disgrasya.
