CEBU CITY-Misugod na sa pagbiyahe ang 80 ka mga bus pinaagi sa gipalusot nga special permits sa Land Transportation and Regulatory Board (LTFRB) alang sa nagsingabot nga piniliay ug Kalag-Kalag.
Mao kini ang gibutyag ni Eduardo Motealto Jr., ang pangu sa LTFRB-7.
Matod sa opisyal nga nagsugod ang operasyon sa maong mga bus kagahapong adlawa, Oktubre 24, hangtod sa umaabot nga Nobyembre 5.
Dugang sa opisyal nga gipanglantawan nila nga magdungan og pauli ang mga pasahero ngadto sa ilahang tagsa-tagsa ka mga probinsya aron sa pagbotar ug alang sa pagsaulog sa Kalag-Kalag, hinungdan nga musaka ang gidaghanon sa mga pasahero sa mga terminals.
Sa pikas nga bahin, hingusgan sa mga sakop sa Philippine National Police (PNP), Cebu City Transportation Office (CCTO), ug sa LTFRB region 7 ang kalabot sa mga colorum nga mga sakyanan nga mubyahe sa mga kadalanan.
Matod ni Montealto nga mamahimong i-impound ang mga masakpan nga mga colorum nga sakyanan ug pamultahon.
Hugot usab nilang gipahimangnoan ang publiko nga dili musakay sa maong mga matang sa sakyanan aron sa ilahang kaugalingong seguridad.
