CENTRAL VISAYAS- Malampusong na-rescue ang siyam ka survivors sa labor trafficking gikan sa Tawi-tawi sa Mindanao niadtong Sabado, Hunyo 21, 2025.
Kung diin, gi-turn over dayo sila sa Department of Social Welfare and Development (DSWD)-7 human sila mitugpa sa Mactan-Cebu International Airport sa Lapu-Lapu City.
Ang ahensya nakig-alayon sa Ministry of Social Services and Development – Bangsamoro Autonomous Region in Muslim Mindanao (MSSD-BARMM), Mactan Cebu International Airport – Task Force on Anti-Trafficking ug Tawi-Tawi 1st Provincial Mobile Force Camp (PMFC) Tawi-Tawi Provincial Office (TTPO), aron pagtabang sa mga survivors.
Human sa inisyal nga proseso, ang mga biktima gidala sa Protective Services Division (PSD) sa DSWD-7 alang sa dugang nga tabang ug psychosocial intervention. Sa ulahi, sila giturn-over sa Municipal Social Welfare and Development Office (MSWDO) sa Talibon, Bohol alang sa padayong pag-atiman ug reintegrasyon.
Ang maong operasyon sa pagluwas gipahigayon sa mga otoridad ug ahensya nga nagtinabangay aron maprotektahan ang mga biktima sa human trafficking.
Ang tanang biktima-survivors, mga lumulupyo sa Talibon, Bohol, mipaambit sa makahahadlok nga mga kasinatian sa pagkahikaw sa gisaad nga suhol, gipailalom sa malisud nga kahimtang sa pagtrabaho, sobra nga trabaho, ug pagkaulipon sa utang ubos sa kontrol sa ilang handler.
Hinungdan, nga ang MSWDO, sa pakig-alayon sa mga kaubang ahensya sama sa MPESO, Office of the Municipal Agriculturist, PNP, DSWD, ug hingtungdan nga mga Barangay Officials, komitado sa paghatag og komprehensibo nga pagdumala sa kaso ug gikinahanglang interbensyon alang sa ilang pagkaayo ug reintegrasyon.
