CEBU CITY-Nakatakda nga pasakaan og kasong obstruction of justice ang usa ka inahan nga nanumbag sa itlog sa usa ka police officer human nga gisikop ang iyang anak atol sa buybust operation sa may Brgy.Matutinao,Badian,Cebu.
Giila ang maong inahan nga si Gemma Abelardo Sumampong ug ang iyang anak nga si James Peter Greaves aka ‘ames” nga pareho residente sa maong dapit.
Una niini, matud ni SPO2 Jeremias Elardo nga nagpahigayon ang Baidan PS ug buybust operation kung diin target nila si “ames”.
Apan sa dihang gisikop na kini kalit matud pa nga gisumbag sa inahan niini ang itlog sa pulis nga misikop sa iyang anak.
Mi-utong nalang matud pa ang maong pulis ug giapil pag sikop si Gemma.
Wala hinoon nagrabehan ang maong pulis ug miingon nga wala siyay mahimo sanglit mao kini ang ilang trabaho.
Samtang nakuhaan og walo ka gagmayng pakete sa shabu ug adunay DDB value nga 4,000 pesos si Ames nga gihulagway nga street level drugpusher.
Sa pagkakaron nagtingkagol ang inahan og anak sa prisohan samtang gipaabot ang kaso nga ipasaka niini karong adlaw nga Lunes.
