CEBU CITY – Nikabat sa 6 milyones nga kantidad sa shabu ang nakumpiskar sa mga otoridad sa buybust operation sa Sitio Lawis, Barangay Mambaling dakbayan sa Sugbo.
Giila ang suspetsado nga si Reneil Estomago Monceda, 28 anyos ug residente ra usab sa nahisgutang lugar. Nakuha sa operasyon ang usa ka medium pack ug lima ka large pack nga shabu nga nitimbang ug 503.9 ka gramos.
Sa pakighinabi sa Bombo Radyo ni Police C/Insp Regino Maramag, ang hepe sa Pardo Police Station, matod pa usa ka newly-identified high value target ang subject apan wala nila giwala ang posibilidad nga dugay na kini sa ilegal nga negosyo.
Dugang pa sa hepe nga provincewide ang distribusyon niini sa ilegal nga drugas. Giingon nga adunay supplier ang subject sa mga ilegal nga drugas ug mao kini ang padayon nilang giimbestigaran.
Sa pagkakaron nagtingkagol na ang suspetsado sa Pardo detention cell ug gikatakdang pasakaan ug tukmang kaso batok niini.
