CEBU CITY – Anaa na karon sa luwas nga kahimtang ang 12 ka mga pasahero nga misakay sa nalunod nga pumpboat sa Isla sa Malapascua, sa lungsod sa Daanbantayan, Cebu.
Matod pa sa disaster officer sa Daanbantayan nga si Tilano Dublin, nga nakakita ang mga mananagat og baroto diin hinay-hinay kining nalunod maong miresponde sila dayon.
Nasayran nga ang ilang gitan-aw nga hinungdan mao ang pagkadako sa iyang buslot sa sakayan ug gibutngan usab kini og lansang, ingon man ang kusog nga hangin ug dagkong bawod.
Samtang, naluwas usab ang patay’ng lawas sa inahan sa tag-iya sa sakayang panagat nga si Ricky Paradero. Gihatod ni Paradero ang patay’ng lawas sa iyang inahan ngadto sa ilang pinuy-anan sa Burias Island, sa Masbate aron malubong na kini.
Misakay usab sa baroto ang ilang mga kabanay. Dugang pa ni Paradero nga ang iyang sakayan usab ang nahimong service tungod kay mananagat usab siya ug mao kini ang ilang panginabuhi-an.
Nagpasalamat usab si Paradero sa LDRRMO sa lungsod sa Daanbantayan human sila maluwas.
Sa pagkakaron, gi-ayum-ayum na ang buslot sa sakayang panagat samtaang anaa pa sa buhatan sa Philippine Coast Guard si Paradero alang sa imbestigasyon.
