CEBU CITY – Nabalhog sa prisuhan ang 2 ka mga babaye ug usa ka ex-convict human nakuhaan og dul-an P4-milyones nga balor sa ginadiling drugas atol sa managlahing buybust operation sa dakbayan sa Sugbo.
Una niini, nasikop ang 18-anyos nga subject nga si Sheena Mae Sable ug ang kauban niini nga si “Angie”, 17 anyos sulod sa usa pension house sa Sikatuna St., sa maong dakbayan.
Matud sa hepe sa Drug Enforcement Group (DEG) – Visayas nga si Police Lt. Col. Glenn Mayam nga gipaubos sa 2 ka semanang surveillance ang 2 ka mga dinakpan, kinsang nalambigit sa usa ka drug syndicate.
Dugang pa ni Mayam nga misulod ang 2 sa maong negosyo sa tinguha nga daling makakwarta.
Nakuhaan ang 2 og 150 grams sa gidudahang shabu nga mikantidad og kapin P1-million.
Samtang nasikop ang ex-convict nga si Froilan Kabalican, 22 anyos atol sa laing operasyon sa Brgy. Ermita.
Kini human nga nakuhaan og 400 grams sa gidudahang shabu ug mikantidad og P2.7 million.
Nasayran nga nabalhog si Kabalican niadtong tuig 2016 gumikan sa pagkalambigit sa ilegal nga drugas.
Pasakaan ang mga dinakpan og kasong kalapasan sa Republic Act 9165 kon Comprehensive Dangerous Drugs Act.
