CEBU CITY – Angayan nga hatagan og due process ang outgoing mayor sa dakbayan sa Sugbo nga si Tomas Osmeña aron matino kung usa ba kini nga giingong drug protector.
Kini ang komento sa kanhi-mayor ug ang nakadaug sa pagka-bise mayor sa dakbayan nga si Michael Rama subay na sa pamahayag ni Police Regional Office-7 Director Brigadier General Debold Sinas mahitungod sa gituohang pagka-drug protector ni Osmeña.
Matud ni Rama nga dili sya angayang mapareha sa karibal sa pulitika nga si Osmeña nga naghatag og mga bug-at nga pasangil bisan og walay igong basehan ug dili pinasubay sa balaud.
Kahinumduman nga ginganlan ni Pres. Rodrigo Duterte si Rama nga usa sa giingong mga “narcopoliticians” niadtong tuig 2016 ug gisakyan pa usab ni Osmeña ang maong isyu.
Apan gitino na ni Rama sa dihang nahimo kining kaalyado ni Duterte isip kandidato sa pagka-bise mayor sa nakalabay nga piniliay.
Samtang gikondenar usab ni vice-mayor elect Rama ang sunud-sunod nga pagpatay sa dakbayan ilabi na ang pagpamanhig sa kanhi-senior investigator sa CIDG-7 nga si Police Capt. Delfin Bontuyan.
Nanghinaut usab si Rama nga dili na gayud dugangan pa ang mga inosente nga nahimong biktima sa walay hunong nga pagpamusil-patay.
