CEBU — Patay sa pagkalumos ang usa ka lalaki human nga misuway og luwas sa iyang pag-umangkon sa Wakiki Beach Resort sa Brgy. Uwak, sa lungsod sa Asturias, Cebu.
Giila ang biktima nga si Wendell Quia-ot, 34 anyos, ug taga-Brgy. Gaas, sa lungsod sa Balamban.
Matud ni Police Master Sergeant Bryan Alarcon sa Asturias Police Station nga gisuway og luwas sa biktima ang iyang pag-umangkon nga si Mark Kenneth Quia-ot human nalumos sa kadagatan.
Apan pagkataud-taud nalumos hinuon ang 34-anyos nga biktima human niya giluwas ang pag-umangkon niini.
Daling gidala sa tambalanan ang biktima apan nakabsan kini sa kinabuhi ug gideklarar nga dead on arrival.
Dugang pa ni Alarcon nga dili kaayo lawom ang gilangoyan ni Wendell apan nakasugakod kini og dakong balud sa kadagatan tungod na usab sa bati nga panahon.
