CEBU CITY-Mukabat sa dul-an 5 milyones ka pesos ang balor sa shabu nga nasakmit sa Carbon PNP sa managlahi nga operasyon.
Sikop sa buybust nga gipahigayon sa Brgy. Duljo Fatima niining dakbayan ang usa ka 18 anyos nga usa ka High value target drug pusher.
Gilla kini nga si Giovanni Mangkaw alyas ‘Dongdong’ ug residente sa naasoy nga dapit.
Matud sa hepe sa Carbon PNP nga si PCapt. Alvin Arsola Llamido nga kanunay nga mugawas ang pangalan ni alyas dodong sa ilang mga interrogation matag duna silay madakpan nga mga street level pusher.
Sa dihang nakompirmar, ila gyud dayon matud pa kining gi-operasyonan.
Nasakmit gikan niini ang shabu nga dunay gibug-aton nga 500 grams ug mukabat sa 3.4 million pesos ang balor.
Dugang pa usab ni Llamido nga posible nga samtang minor de edad pa kini gigamit na kini sa mga iligalista para sa iligal nga transaksyon sa iligal nga drogas.
Samtang, sa laing operasyon sa Carbon PNP, nasikop usab ang usa pa ka lalaki sa may Brgy. Ermita. Giila kining si Sanny Bermudes, 21 anyos ug residente sa Jones Avenue.
Nakuha usab gikan niini ang 2 ka medium pack ug usa ka large pack sa shabu nga dunay gibug-aton nga 190 grams ug mukabat sa 1,292,000 pesos ang balor.
Dugang pa usab ni PCapt. Llamida nga duna na silay nakuha nga impormasyon sa posibleng mga koneksyon sa mga nasikop para pahigayonan na usab nila og follow up operation.
