CEBU CITY — Patay nang nakaplagan sa Barangay Babag, dakbayan sa Lapu-Lapu, Cebu ang usa ka gituhu-ang durugista niadtong Agosto 20 sa buntag.
Giila ang biktima nga si Nelson Primacio Rosane, 47 anyus, minyu, ug residente sa Barangay Catarman, lungsod sa Cordova, Cebu.
Gisaysay ni Police Master Sergeant Eleazar Illanes, imbestigador sa Cordova Police Station, nga basi sa ilahang pakighinabi sa misis sa biktima, giingung pasado alas-1 sa kaadlawun, kalit nga adunay armado nga lalaki nga misulud sa ilahang panimalay ug gidala ang biktima.
Matud pa nga nag-inusara lang ang suspek apan giingung aduna kini duha ka mga kauban nga nagpaabut sa gawas.
Pasado alas-6 sa buntag kagahapon nakaplagan na lang kini nga wala na’y kinabuhi sa Barangay Babag sa Lapu-Lapu.
Gitug-an usab ni PMSg. Illanes nga anaa sa ilahang watchlist ang biktima kung diin basi usab sa impormasyon gikan sa mga silingan niini nga gawas nga tiggamitan, giingung namaligya usab kini ug iligal nga drugas.
Subay niini, gilantaw sa kapulisan nga ang kamatayun sa biktima ang adunay kalambigitan sa ginadiling drugas.
