CEBU CITY — Naluwas sa mga sakup sa Coast Guard Bohol ug Panglao ang napulo ka mga Chinese national human nga mipalyar ang motorbanca nga gisakyan niini sa Balicasag Island, Bohol.
Gisaysay ni Lt. Junior Grade Michael Encina, tigpamaba sa Philippine Coast Guard 7, nga nakadawat ug ‘distress call’ ang Coast Guard-Balicasag hinungdan nga dali kini nga mirespondi.
Matud pa nga nanawag pa kini ug dugang pwersa hinungdan nga mi-abut usab ang Coast Guard Panglao.
Sigon ni Encina nga pasado alas 8 sa gabii nakita ang ‘distress motorbanca’ kung diin sakay niini ang napulo ka mga Chinese national.
Sa imbestigasyon, nasayran nga gikan nag-island hopping ang maong langyaw sa Sumilon Island, Oslob, Cebu ug pabalik na unta sa Panglao, Bohol sa dihang mipalyar ang ilahang gisakyang motorize banca.
Hinu-un, luwas lang nga nadala pagbalik ang mga insik sa Alona Beach, Tawala, Panglao.
Gipahibalu ni Lt. Junior Grade Encina nga gi-hold karun ang motorbanca ug posibling matangtangan ug certification gikan sa Marine Industry Authority (MARINA) ang operator niini gumikan sa paglayag panahon sa kagabhi-un ug wala usab kini nagpa-clear sa Coast Guard.
Gipasabut ni Encina nga gidili nila ang mga motorbanca nga mulayag panahon sa kagabhi-un arun nga malikay sa disgrasya.
