CEBU CITY – Luwas na ang kahimtang sa usa ka high profile lawyer sa Cebu human nga gi-ambush sa gawas sa Cebu City Hall of Justice sa Qimonda Building, North Reclation Area, dakbayan sa Sugbo.
Giila ang biktima nga si Atty. Inocencio Dela Cerna nga adunay gihuptan nga mga bug-at ug kontrobersyal nga kaso.
Sa pakighinabi sa Bombo News Team kang Police Senior Inspector Adolfo Abregana, Jr. ang Chief of Operations sa Port Police sa Cebu Port Authority (CPA), gisaysay niini nga una nang gitirahan ang nahisgutang abogado sa dihang pagawas na kini sa korte apan giingug dali kini nga naka-maneuver sa iyahang sakyanan.
Matud ni PSInsp Abregana nga dali nga midiritsu si Atty Dela Cerna sa Waterfront Police Station, ang pinakadu-ul nga police station sa nahisgutang korte ug gisundan pa kini sa mga gunman sakay sa usa ka motorsiklo.
Dugang pa niini, dali usab nga nakadagan ang mga suspek sa dihang nag-return fire ang abogado.
Luwas na usab ang kahimtang sa abogado ug bugtung samad sa bukton ang naangkun niini.
Sa pagkakarun, gi-imbestigaran na sa kapulisan ug NBI 7 ang insidente ug giingung posibling adunay joint investigation nga ipahigayun.
