CEBU – Hingpit nang naputol ang 32 ka mga dagkong punuan sa kahoy, lakip na ang mga century-old trees, sa Brgy. Inoburan, City of Naga, Cebu.
Kini human nga giputol sa mga sakop sa Department of Public Works and Highways (DPWH) ang nahisgutang mga kahoy nga nagtubo daplin sa dalan alang sa ilang road widening projects sa Sugbo.
Midepensa ang City Administrator nga si Engr. Arthur Villamor nga igo silang misuporta sa proyekto sa DPWH bisan pa man og dili kagustuhan sa City Government ang pagputol sa mga kahoy.
Matud niini nga dili sila ang angayang basulon sa mga environmentalist ug mga lumulupyo kung mipagawas sila og certificate of no objection alang sa pagputol niini.
Dugang pa ni Villamor nga angayang basulon sa mga nagprotesta ang Deparment of Environment and Natural and Resources (DENR) ug DPWH.
Nasayran nga mihatag og permit ang DENR aron pamutlon ang mga kahoy samtang milukat ang DPWH og tree cutting permit alang sa pagpalapad sa dalan.
Gihimug-atan ni Villamor nga ang tuyo sa maong proyekto mao ang paglikay sa mga aksidente sa kadalanan.
