CEBU CITY — Gipaimbestigaran ni Cebu Governor Gwendolyn Garcia ang usa ka doktor sa Isidro C. Kintanar Memorial Hospital sa lungsod sa Argao kinsa nga giinging nag-walk out ug nag-resign.
Kini human nga nasagmuyo kini sa pagbahin sa ilang sweldo ug sa pagtuo nga malakip sa job order sa mga medical staff sa Capitol ubos sa gi-hire nga bag-ong service provider.
Matud ni Garcia nga posibleng nag-asumer ang maong doktor nga malakip siya sa bag-ong service provider nga gi-hire sa Provincial Government.
Gitino usab ni Garcia nga dili basta-bastang makabiya ang mga medical staff sa mga provincial hospital diin gawas sa ilang gipanumpaan nga propesyon, aduna pa silay kontrata sa Capitol.
Nasayran nga ubos sa bag-ong lagda sa Provincial Government mius-os ngadto sa 50,000 pesos ang sweldong madawat sa mga doktor sa provincial hospital gikan sa 70,000 pesos kaniadto.
