CEBU CITY-Emosyonal ang lider sa mga sidewalk vendors sa dalan Colon gumikan sa taas nga panahon nga wala na sila makabaligya sa sidewalk bendors sa downtown area, dakbayan sa Sugbo.
Sa pagpakighinabi sa Bombo News Team kang Wilma Cabo, ang presidente sa Colon Vendors Association, kini nagkanayon nga gi-tolerate, matud pa, sa City Government ang mga pay parking area nga maoy nakababag sa kadalanan.
Matud ni Cabo nga nagmingaw ang ilang panginabuhi-an sukad nga gibalhin sila sa Tabo sa Banay niadtong nakalabay nga buwan. Dismayado kini gumikan kay wala sila gipabalik ni Mayor Edgardo Labella sa ilang naandang pwesto bisan pa man matud pa og misugot si Senator Christopher Bong Go kalabot niini.
Samtang nabatyagan ni Basan Amura, ang lider sa Barugg Vendors Association, nga gipanggutom ug nagkalisud na ang mga sama niyang mamaligyaay human maapektaran sa clearing operations.
Matud ni Amura nga hinay kaayo ang halin sa ilang baligya sa dihang gibalhin sila sa laing Tabo sa Banay.
Igo lang, matud pa, nga misunod sila sa mga rekisitos sa PROBE ug sa City Government sa ilang pagpamaligya sa sidewalk.
Samtang naghandum kini nga makabalik sa naandang pwesto human mihatag og go signal si Sen. Christopher Bong Go.
Una na usab nga mibahad ang mga vendors nga kung dili maminaw si Labella sa ilang yango-ngo magdala na sila og banig ug kaldero diin mangatulog ug magluto sila atubangan sa Cebu City hall.
