CEBU CITY — Mibahad ang bag-ong director sa Police Regional Office (PRO)-7 nga si Brigadier General Valeriano de Leon nga walay luna sa headquarters ang mga police scalawags.
Atol sa turnover ceremony sa Camp Sergio Osmeña, nagkanayon si de Leon nga dili angayang panumbalingan sa mga sakop ang kontrobersiya nga gi-atubang sa PNP.
Mitambag ang bag-ong director nga kung kinsa man ang mahimong bag-ong PNP Chief, angayan gayud nga i-restore ang imahe sa kapulisan.
Gimanduan niya dayon ang mga sakop sa PRO-7 nga tumanon ang mga kamanduan ug lihok dayon alang sa kahapsay ug kalinaw sa rehiyon.
Subay sa iyang bag-ong assignment, ipatuman ni de Leon ang subsob nga kampanya batok sa ilegal nga drugas ug krimen.
Gihimug-atan usab niini nga mahinungdanon ang pagbaton og lisensya alang sa armas sanglit online na man ang pagproseso niini.
Nasayran nga gidumala ni de Leon ang PNP Fire and Explosives Office (FEO) isip hepe sa wala pa gidawat ang bag-ong assignment.
Gihangop ni de Leon ang bag-ong assignment isip police director sa rehiyon-7 ug gikalipay niya kini.
‘PERFORMANCE UG DEDIKASYON’
Samtang mitambag ang Officer-in-charge sa PNP nga si Police Lieutenant General Archie Francisco Gamboa nga i-mentenar ang maayong performance ug dedikasyon sa pagpanerbisyo.
Gi-angkon ni Gamboa nga usa ka hagit alang kaniya ang kabag-uhan sa assignment apan kinahanglanon gayud niyang dawaton aron magkat-on.
Bisan pa man sa kontrobersiya sa PNP, gitambagan niya ang mga pulis nga magpabiling ligdong sa serbisyo aron magpadayon ang kampanya batok sa ginadiling drugas, ilegal nga sugal, ug korapsyon.
Gikalipay usab ni Gamboa ang bag-ong assignment ni Brigadier General de Leon sa PRO-7 gumikan sa maayo niyang track record.
Nalipay usab kini pagdumala sa kanhi director nga si Brig. Gen. Debold Sinas sa PRO-7 tungod sa taas nga standards sa leadership.
‘SALAMAT’
Gikalipay sa kanhi-director sa Police Regional Office (PRO)-7 nga si Brigadier Debold Sinas ang pagbiya niini sa rehiyon nga puno sa accomplishments.
Atol sa farewell speech niini, gipasalamatan ni Sinas ang mga kapulisan, mga stakeholders, ug uban pang mga law-enforcing agencies tungod sa ilang kooperasyon.
Matud ni Sinas, kinsang na-assign karon sa National Capital Region Police Office (NCRPO) isip regional director, nakat-on niya ang paghigugma sa Sugbo sulod sa kapin tuig niini nga pagpanerbisyo.
Nanghinaut si Sinas nga mag-collaborate ang kapulisan ug ang mga stakeholders aron masulbad ang problema sa rehiyon ilabi na sa pagmentenar sa peace and order.
