CEBU CITY — Mipahinumdom ang mga sakop sa PNP ngadto sa mga pasahero sa Cebu North Bus Terminal nga mag-amping ug magpabiling alerto batok sa mga dautang elemento.
Matud ni Police Captain Marvin Fegarido, ang hepe sa Mandaue PNP Station 2, nga nanghatag sila og mga basahonon ngadto sa mga pasahero kung unsaon paglikay sa mga insidente sa pagpanguot, pangpangawat, ug uban pa.
24 oras nga nagpatrolyar ang mga sakop sa bus terminal ilabi na nga nagkadaghan na ang mga manakayay nunot ning panahon sa kalagkalag.
Samtang padayong gi-check sa mga kapulisan ang mga dala sa mga pasahero aron dili makalusot ang mga kontrabando sama lang sa mga hait nga butang, mga explosives, ug uban pa.
Naka-deploy ang mga sakop sa kapulisan sa North Bus Terminal hangtud na nga mahuman ang long weekend subay na sa paghandum sa adlaw sa mga patay.
