CEBU CITY — Selos ang giituohang hinungdan kung nganong mipusil sa kaugalingon ang usa ka security guard samtang nagduty sa Brgy. Pulpogan, lungsod sa Consolacion, Cebu.
Anaa sa kritikal nga kahimtang ang biktima nga si Junrie Curbo, 28 anyos, ug nagpuyo sa lungsod sa Sogod.
Matud sa imbestigador nga si Police Corporal Richie Gelliran sa Consolacion Police Station, nga samtang nagpatrolya ang kapulisan, midangop kanila ang usa ka concerned citizen mahitungod sa gidangatan sa maong gwardya.
Sa inisyal nga imbestigasyon, nakit-an na lang sa usa ka empleyado nga nagkadugo ang ulo sa gwardya human nakaangkon og samad-pinusilan.
Gidala ang biktima sa usa ka tambalanan sa Mandaue City apan gipabalhin kini sa Vicente Sotto Medical Center gumikan sa kritikal nga sitwasyon.
Gibutyag ni Gelliran nga sa wala pa nahitabo ang pagpusil, nag-away pirmi si Curbo ug ang iyang girlfriend gumikan sa selos.
Narekober sa kapulisan ang usa ka caliber 38 nga revolver isip service firearms, upat ka buhing bala, ug cellphone nga gipanag-iya sa gwardya.
Gikatakdang makig-alayon ang kapulisan sa pamilya ug girlfriend sa biktima aron sutaon kung aduna pa bay laing problema gawas lang sa giingong selos.
