CEBU CITY – Kausaban sa ‘legal system’ ang nakitang solusyon ni Atty. Arvin Udron, Commission on Human Rights 7 Regional Director, arun nga mapaspasan ang dagan sa mga kaso.
Kini ang reaksyon ni Atty. Udron sa usa ka dekada nga paglanat sa Maguindanao massacre case diin gihandom karung adlawa.
Gipadayag sa regional director nga adunay problema sa hudikatura diin nagkuwang ang mga huwes nga mao ang mulantaw sa nagtipun-og nga kaso.
Matud ni Atty. Udron nga daghang mga korte ang bakante diin walay huwes nga milingkod hinungdan nga napanglantawan niini nga usa sa problema sa kalangay sa dagan sa mga nagkadaiyang kaso sa nasud.
Subay niini, gisugyot ni Udron ngadto sa gobyerno nga dugangan ang mga huwes arun nga mapaspasan ang mga kaso ug mas dali ang paghatag ug hustisya.
Karung adlawa ang ika-10 katuig nga anibersaryo sukad nga nahitabo ang Maguindanao o Ampatuan massacre diin 58 ang patay ug 32 niini ang mga sakop sa tigbalita.
