Natanggong sa prisuhan ang ikalima ug gitudlong prime suspect sa pagpatay ug paglubong sa gituohang drug supplier sa Brgy. Lagtang, Talisay City.
Nadakpan sa lungsod sa Dumanjug, Cebu ang gipangitang suspek nga si Christopher Amion, 20 anyos, ug residente sa Brgy. Lagtang, dakbayan sa Talisay.
Matud sa hepe sa Dumanjug PNP nga si Police Major Ardioleto Cabagnot nga midangop sa ilang buhatan ang usa ka concerned citizen human nakamatikod sa usa ka lalaki kinsang nagduko ug pirming maglikay.
Hinungdan nga girespondehan sa iyang mga sakop ang maong lalaki ug nakumprimar nga si Amion ang gipangitang laing suspek sa pagpatay ug paglubong ni Juniel Cabiluna, kinsang nakawtan sa mga barangay tanod niadtong Nobyembre 26 sa kaadlawon.
Una nang nasikop ang upat ka mga suspek sa pagpatay sa giingong drug supplier silang Jason Cabier, Arwin Calinawan, Rommel Bacacao, ug Gener Bacus atol sa hot pursuit operation sa Talisay City PNP.
Gisaysay ni Cabagnot nga nagsabot ang lima ka mga suspek mahitungod sa planong pagpatay ngadto kang Cabiluna niadtong Nobyembre 25 sa hapon.
Apan gi-angkon ni Amion nga napugos kini sa pagpusil ngadto sa biktima human nahulga nga pamatyon sa kauban niini.
Nabantayan usab sa kapulisan sa Dumanjug nga plano untang mo-ikyas si Amion padung sa Davao, kauban ang iyang pamilya, aron manarbaho.
Kini human nga narekober sa mga imbestigador ang ferry tickets sa panimalay sa suspek.
Gawas niini, nasakmit usab sa kapulisan ang usa ka .38 caliber revolver nga walay dokumento ug pinaketeng shabu nga nagkantidad og 2,000 pesos.
Anaa sa prisuhan sa Dumanjug PNP ang prime suspect ug mag-atubang kini og kasong ilegal nga paghupot sa ginadiling drugas, illegal possession of firearms, ug robbery with homicide.
