CEBU CITY — Gisuta pa sa PNP atol sa imbestigasyon kung mga mag-uuma ba ang nag-amuma ug nag-cultivate sa halapad nga marijuana plantation sa Brgy. General Climaco, Toledo City, Cebu.
Kini human nga gilarot sa mga sakop sa 2nd Police Mobile Force Company (PMFC) ang 43,000 ka mga fully-grown marijuana plants sa maong lugar diin mikabat kini ngadto sa P17-milyones.
Matud sa hepe sa 2nd PMFC nga si Police Lieutenant Colonel Dominic Poblete nga misumbong sa kapulisan ang usa ka concerned citizen human mabantayan nga nagpatrolya ang mga armadong lalaki sa maong lugar sa panahon sa kagabihon.
Hinungdan nga nagmalampuson ang maong operasyon bisan pa man og wala silay naabtang mga cultivators.
Natingala og dako si Poblete human masayran nga giingong mas gipili sa pipila ka mga mag-uuma ang pagpananom og marijuana gumikan sa kakusog sa demand niini, itandi sa mga prutas ug otanon.
Dugang pa sa hepe nga ika-upat na ka higayon nang gilarot ang maong marijuana plantation sa Brgy. General Climaco.
Tungod niini, makigsabot ang habig sa PNP ngadto sa mga opisyal sa maong barangay aron makakuha og libreng mga seedlings ug matamnan ang maong lugar og prutas, otanon, ug uban pang mga lagutmon.
