Mipahinumdom ang PNP ngadto sa katawhan nga magpabiling kalmado ug mabugnawon ang utok sa sulod sa mga malls subay ning nagkaduol nga panahon sa Pasko.
Kini human nga nakapyansa na ang babayeng nanagmal og tindera sulod sa usa ka dakong mall sa Cebu Business Park, sa dakbayan sa Sugbo.
Kahinumduman nga nag-viral sa social media ang away sa suspek nga si Medilina Yamazaki ug ang promodiser sa humidifier nga si Jennifer Fabillar gumikan lang sa maong produkto.
Midangop sa City Prosecutor’s Office ang suspek aron mohatag og P3,000 nga pyansa alang sa temporaryo niining kagawasan.
Matud sa hepe sa Mabolo Police Station nga si Police Major Dindo Juanito Alaras nga nag-atubang si Yamazaki og kasong physical injury, grave threat, ug serios mischief.
Dugang pa ni Alaras nga gipaubos sa psychological evaluation si Yamasaki sa Vicente Sotto Memorial Medical Center niadtong Disyembre 12 apan nakit-an kini nga “unfit to stand trial.”
Base sa saysay sa mga kabanay sa suspek nga aduna kini post-partum depression human nahimugso sa iyang anak.
Apan gitataw ni Alaras nga ang korte na mismo maoy maghukom kung i-appreciate ba ang maong dokumento.
‘Kalma lang’
Aron malikayan ang mga kagubot, mitambag si Alaras sa publiko nga mas maayong ipadangat sa mall management ang reklamo aron makahimo og formal complaint.
Dugang pa nga tambag sa hepe nga dili magpadala sa kainit sa ulo ang problema ning panahon sa Christmas rush.
