CEBU CITY– Gi-ambush patay sa wala pa matino nga mga suspect ang usa ka veterinarian sa may Purok Maanyag Central Biasong Talisay, City Cebu.
Giila ang naasoy nga doktor nga si Niel Pala Boligao, 48 anyos lumad nga taga Cagayan De Oro apan temporaryo kining nagpuyo sa Brgy. Cansojong ng naasoy nga dakbayan.
Basi sa imbestigasyon, gi-atngan ang biktima sa duha ka lalaki’ng sakay sa motorsiklo ug gipauwanan og bala ang doktor nga niadtong higayona sakay sa iyang sakyanan og pagawas na gikan sa usa ka slaughter house sa naasoy nga lugar.
Sigon sa business partner sa biktima nga si Stella Acbayan sa pakighinabi sa Bombo Radyo Cebu, nga dili niya masabtan kung ngano nga nahitabo kini sa iyang business partner sanglit wala siyay nasayran nga nahimong kontra niini.
Nasayran nga namaligya og karneng baboy ang duha ug gihimug-atan ni Acbayan naa sulod sa 3 tuig nila nga kauban sa patigayin wala silay problema gumikan kay bootan man usab ang doktor.
Apan nasayran nga duna kini dagkong farm sa Cebu ug walay pamilya apan maoy nagbuhi sa ginikanan og mga igsoon.
Padayon usab nga giimbestigaran sa kapulisan ang nahitabo ug ang motibo sa pagpamusil.
