CEBU CITY – Anaa na sa ‘stable condition’ ang 5 anyos nga bata human nga gi-isolate sa usa ka pribado nga tambalanan dinhi sa dakbayan sa Sugbo gumikan kay giingong nag-positibo kini sa coronavirus.
Gipahibalo ni Dr. Rene Josef Bullecer nga nahinabi niini ang doktor sa maong bata ug giingong anaa na sa maayo nga kondisyon ang 5 anyos ug nawagtang na usab ang mga sintomas sa virus.
Apan giklaro ni Dr. Bullecer nga gipaubos sa gihapon sa obserbasyon ang maong bata.
Una niini, niadtong Enero 12, mi-abot sa Sugbo ang mag-inahan gikan sa Guangzhou, China ug nasayran nga gikan sa Wuhan City ang inahan sa bata.
Human nga nakita-an ug pipila ka sintomas ang bata sama na lang sa ubo, dali kini nga gidala sa tambalanan ug gikuha-an ug laboratory samples.
Subay niini, gipatuman na sa Mactan Cebu International Airport ang heightened surveillance ilabi na sa mga pasahero nga gikan sa China partikular na sa Wuhan City.
Hinuon, gisiguro sa DOH 7 sa publiko nga adunay kapasidad ang Bureau of Quarantine ug mga local health units taliwa sa gikahadlokan nga coronavirus nga gikan sa China.
