CEBU CITY — Moduso si Cebu Provincial Governor Gwendolyn Garcia og libel complaint batok sa usa ka reporter kinsang gituohang nagpost og pamahayag sa social media batok kaniya.
Atol sa pakigkita ni Garcia sa mga quarantine violators gikan sa Talisay City, gipakita niini ang screenshots sa mga post ni Rhea Ruth Rosell.
Sigon pa sa post sa maong reporter, nakapangutana siya kung daw gi-angoango ba ang gobernadora atol sa mga press conferences.
Samtang mopasaka og kaso si Garcia batok ni Rosell tungod sa gituohang pag-post og sayop nga impormasyon kalabot na sa kamanduan nga nagdili sa pagpangaligo sa tanang kadagatan, lakip na ang mga kasapaan ug waterfalls sa Easter Sunday.
“Ayaw na intawon mo og agi sa sapa. Bawal na magsag-ob, maligo, manghugas og plato ug manlaba sa sapa, utang buot,” sigon pa sa post ni Rosell.
“Ako ba gud nang gibawal? O basin lain pod na siya nga gubernadora nga naghimo og executive order…Wa ka kasabot, Rhea Ruth Rosell? Kanus-a man tawon giprohibit nato ang pagpanagat, ang pagpanguha ug uban nga kalan-unon gikan sa dagat? Basa gud diha. Kahibawo ka mobasa? Reporter man unta ka,” tubag pa ni Garcia.
Pinasubay kini sa executive order 5-L-1 nga giluwatan ni Garcia aron striktong ipatuman ang physical distancing.
Nagpabiling abli ang Bombo Radyo Cebu alang sa habig ni Rosell kalabot na sa maong akusasyon.
