CEBU CITY — Mi-apelar mismo ang kapitan sa Barangay Labangon, dakbayan sa Sugbo, sa mga residente nga magsinabtanay na lang ang tanan tungod kay ang COVID-19 mismo ang maoy kontra.
Kini ang nahimong reaksyon ni Kapitan Victor Buendia human nga nahimong kisaw sa publiko ang giingong diskriminasyon ngadto sa usa ka medical frontliner sa Sitio Callejon sa maong barangay.
Sa video nga gi-upload ni Janly Grace Demol, makita nga wala pasudla sa mga barangay volunteers ang usa ka nurse ug nisangput kini sa panaglalis.
Matud ni Buendia nga posibleng nakuwangan sa kasayuran ang mga volunteers maong nahitabo ang maong panaglalis.
Dugang pa sa kapitan nga nibalhin na lang og laing pinuy-anan ang nurse human sa maong insidente.
Namalihug si Buendia nga dili gayud mag-away inay sabton na lang ang kahago sa mga medical frontliners.
Sa pagkakaron, gihikay na sa Cebu City Legal Office ang patung-patong nga kaso ngadto tulo ka mga barangay volunteers kinsang nang-away sa maong nars.
