CEBU CITY — Napalgang patay ang usa ka edarang lalaki human nga gikatahong na-heatstroke samtang nagpaabot sa ayuda gikan sa gobyerno sa Brgy. Lawaan, Dumanjug, Cebu.
Giila ang biktima nga si Lolito Ferrer, 59 anyos, ug residente usab sa nahisgutang dapit.
Matud ni Police Master Sergeant Nelson Mendaros sa Dumanjug Police Station, nga nilinya ang maong lalaki sa barangay hall aron makakuha og hinabang ubos sa social amelioration program kagahapon.
Bisan pa man sa nasinating kainit sa panahon, niuli una ang maong biktima sa ilang panimalay aron unta maniudto.
Gidala sa mga responders ang maong lalaki sa tambalanan human maabtan nga wala nay kinabuhi sa kadaruhan apan gideklarar kini nga dead on arrival.
Mitambag karon ang kapulisan sa mga edaran nga buot mo-avail sa hinabang sa gobyerno nga magdala og proteksyon batok sa kainit o di ba kaha magpakuyog og laing tawo.
