CEBU CITY — Imbestigaran ni Cebu City Mayor Edgardo Labella ang mga residente kinsang giingong nagsayaw-sayaw sa gawas sa Barangay Mambaling ning dakbayan.
Kini human nga nahimong viral sa social media ang video kung diin nagsayaw ang pipila ka mga residente sa Sitio Tinabangay, Mambaling bisan pa man sa nagkasakang kaso sa COVID-19.
Matud ni Labella ng klaro ug tataw nga kalapasan ang ilang gihimo bisan pa man sa striktong pagpatuman sa stay-at-home policy ug uban pang health protocols.
Gimanduan na sa mayor ang City Legal Office, pinaagi ni Atty. Rey Gealon nga mopahigayon og imbestigasyon ug makig-alayon sa mga sakop sa barangay kalabot niini.
Mipasidaan si Labella sa mga publiko nga kini maoy magsilbing leksyon alang sa kinsang makalapas sa mga kamanduan ubos sa enhanced community quarantine.
‘Encouragenment lang’
Gipasabot sa kapitan sa Brgy. Mambaling, dakbayan sa Sugbo nga usa lang ka pag-awhag ang gibuhat sa barangay konsehal ngadto sa mga residente sa Sitio Tinabangay.
Matud ni Kapitan Gines Abellana nga si Konsehal Seler Salvador mismo ang nagpahigayon sa maong kalihukan isip usa ka matang sa ehersisyo.
Giklaro ni Abellana nga ni-awhag si Salavdor nga dili angayang ikaguol ang mga nagpositibo sanglit mga asymptomatic lang sila.
Subay sa maong alegasyon, makig-alayon si Mayor Edgardo Labella ngadto sa kapitan aron imbestigaran ang maong viral video.
