CEBU CITY — Gibana-banang mokabat sa P2-million ang danyos sa nahitabong dakong sunog sa usa ka bodega kagabii sa mga LPG tanks sa Brgy. Poblacion, sa lungsod sa Liloan, Cebu.
Girespondehan sa mga sakop sa Liloan Fire Station ang maong sunog sa takna nga alas-6:34 sa gabii diin giisa kini sa third alarm ug napawong dayon pagkalabay sa usa ka oras.
Matud ni Fire Officer 3 Eustaquio Jonas nga niulbo ang ka’yo sa storage area nga gipanag-iya ni Al Vincent Judelia diin adunay commercial building sa atbang niini.
Dugang pa ni Jonas nga gisubay sa mga imbestigador ang saysay sa mga nakakita kung aduna bay nasunog nga basura sa maong bodega.
Hinungdan nga naapektuhan usab sa dakong sunog ang katapad nga building nga adunay mga surplus nga sakyanan.
Walay naangol o namatay human sa nahitabong dakong sunog sa Liloan.
