CEBU CITY — Sikop ang usa ka barangay kagawad human nga nakuhaan og linibo nga balor sa ginadiling drugas sa usa ka buybust operation kaganihang buntag sa Brgy. Looc, Bais City, Negros Oriental.
Giila ang dinakpan nga si Romel Resente, 46 anyos, residente sa nahisgutang barangay, ug nanag-iya og usa ka motorcycle parts shop sa maong lugar.
Matud sa tigpamaba sa Philippine Drug Enforcement Agency (PDEA)-7 nga si Leah Alcantara nga nisumbong sa otoridad ang usa ka concerned citizen kalabot na sa ilegal nga kalihukan ni Resente.
Moabot sa duha ka buwan ang case build-up sa maong barangay konsehal ug nasayran nga maka-dispose kini og 20 ka gramos sa matag semana.
Dugang pa niini nga ginagmay lang ang baligya sa konsehal sanglit giingong gigamit ang shabu alang sa personal consumption.
Nakuhaan ang konsehal og upat ka pakete sa gidudahang shabu nga adunay gibug-aton nga dos gramos ug mikantidad og P13,600.
Nasignit usab sa otoridad ang usa ka kalibre 45 nga armas nga adunay lima ka buhing bala ug usa ka magazine sa susamang kalibre.
Mag-atubang ang dinakpan og kasong illegal possesion of firearms ug ilegal nga pagpayuhot sa ginadiling drugas. (with reports by Bombo Benjie Tanghiyan/gn)
