CEBU CITY — Gikompirmar ni Fr. Aladdin Luzon, sa Order of Saint Agustine (OSA) ug ang laison officer sa Basilica Minore Del Sto. Niño nga dunay 5 ka mga nagpositibo sa Covid-19 nga ilang kauban sa simbahan.
Kini human nga gipaubos sa swab test ang 41 ka mga sakop sa Basilica Minore Del Sto. Niño.
Matud ni Luzon nga ang mga pari, nagnegatibo matud pa sa migawas nga resulta sa swab test apan ang mga nagpositibo mao ang ilang mga personnel.
Pagsaysay pa ni Luzon nga ang unang suspected case nga gipagawas usab sa simbahan pinaagi sa usa ka advisory niadtong Mayo 25 kung diin duna gyud kini nakitaan nga simptomas sa Covid-19 maoy hinungdan nga nagrequest sila og swab test.
Hinoon sigon ni Luzon nga ang mga nagpositibo sa Covid-19 nga kaubanan nila sa simabahan ang asymptomatic ug wala na usab kini migawas pa sa ilang compound sukad pa niadtong wala pa kini gi-swab sanglit naka quarantine na kini.
Gipalig-on matud pa sa simbahan karon ang ilang protocol kung diin nagpahigayon na dayon sila og contact tracing ug mga repeat test.
Ingon man padayon nga nagdis-infect ang simbahan ug nakig-alayon na usab sila sa City Health Office.
Ug tungod kay sirado pa ang Basilica, makatabang matud pa kini nga mapadayon ang ilang pagmintinar sa kahimsog sa panglawas ug kalimpyo sa simbahan hangtod nga mahimo kining Covid-free.
Gani ang unang suspected case ang karon himsog na ug naghuwat nalang sila sa sunod nga resulta kung kini hingpit naba nga negatibo sa Covid-19. (FDP)
