CEBU CITY — Dili uyon si DepEd 7 Regional Director Dr. Salustiano Jimenez sa gitawag nga ‘education freeze’ o dili pagpadayon sa klase karung tuiga.
Gibutyag ni Dr. Jimenez nga ang labing nindot nga butang nga ikabilin sa usa ka ginikanan ngadto sa iyahang anak, mao man ang edukasyon hinungdan nga dili mahimo nga hunungon kini gumikan lang sa gikabalak-an nga pandemya.
Matud pa nga kung dili ipadayon ang edukasyon, giingong susama lang kini nga gipugngan ang mga tinun-an, ilabi na ang mga kabatan-onan nga makapadayon sa pagkab-ot sa ilahang kaugmaon.
Sigon pa sa DepEd official nga daghang pamaagi nga mahatud ang edukasyon ngadto sa mga kabatan-onan taliwa sa pandemya, diin mao na kini ang ilahang padayon nga gipangandaman, sama na lang sa modular, radio-based ug online learning.
Gituohan ni Jimenez nga daghang maanindot nga makab-ot ang mga tinun-an alang sa ilahang maayo nga kaugmaon kung ipadayon ang pagtungha.
Subay niini, gisiguro sa opisyal nga mahatagan gayud ug kalidad nga edukasyon ug luwas nga pamaagi ang mga tinun-an taliwa sa COVID-19 pandemic. /sbr
