CEBU CITY — Walay gamit ug dili “sustainable” alang usa ka environmental advocate ang paggamit sa synthetic white sand gikan sa Cebu alang sa Manila Bay rehabilitation project.
Matud ni Teody Navea nga igo lang nga gibutangan ang maong balas gikan sa Alcoy, Cebu ngadto sa hugaw nga bahin sa maong baybayon aron lang nga mogwapa.
Gihulagway sa maong advocate nga dakong anugon ang multi-million project kung mabanlas lang kini ug parehong maperwisyo ang Sugbo ug ang Manila.
Gihimug-atan usab ni Navea nga supak kaayo ang pagkuha sa dolomite stones gikan sa Alcoy ug giproseso aron himoong balas sa sa Manila Bay, pinasubay sa mga environmental laws.
Dugang pa ni Navea nga mas maayong ipatuman na lang ang mga sustainable project sa Manila Bay sama lang sa pagpananom og mangroves sa maong hugaw nga baybayon.
Una nang gisaway sa uban pang mga environmental advocates ang nahimong proyekto isip kabahin sa Manila Bay rehabilitation diin mikabat kini og P795,000 per square meter.
Kahinumdumang gikumpirmar sa Mines and Geosciences Bureau (MGB)-7 nga ni-isyu kini og permit ngadto sa Dolomite Mining Corporation (DMC) sa Barangay Pugalo, Alcoy aron ipadala ang 3,500 metric tons sa processed dolomite paingon sa kaulohan. /gn
