CEBU CITY — Gibutyag ni Cebu City Councilor Prisca Niña Mabatid nga dili elected official ang iyang gipasabot nga ‘ungo’ sa iyang gi-post sa social media.
Ginganlan niini nga ‘ghost mayor’ ang maong indibidwal nga matod pa maoy nagbuot-buot sa pagpadagan sa City Hall sa dakbayan sa Sugbo nga mao usab matod pa ang nagdiktar sa mga matod pa ‘puppet councilor’ kung unsa ang buhatan.
Sigon pa ni Mabatid nga wala niini gibasol si Mayor Labella sa kasamtangang sitwasyon apan gitawag niini ang sitwasyon karon nga ‘Cebu City is a big mess’ o anaa sa kasamok.
“Unsa man mabuhat nako nga konsehal ra man ko? I have solutions to the problem pero wa man tagai ug bili ang elected official. Sila2x ray plano puro ra ba palpak. Kabalo ba mo nga naay “ongo” sa city hall nga maoy nag buot2x sa tanan gikan sa pag padagan sa city hall, sa mga supplier sa bugas ug tig diktar sa mga “puppet” councilors unsay buhaton sa budget, kinsay tagaan ug kinsay Dili?” sigon sa post ni Mabatid.
Sakit matod pa sa Konsehal nga ang usa ka elected official mao matod pa ang katapusan nga makahibalo sa gipangbuhat sa mga opisyal.
Subay niini gihimug-atan sa opsiyal nga prayoridad niini karon ang pagtabang sa mga Sugbu-anon ilabi na ning panahon nga nagpabilin ang hulga sa coronavirus.
