CEBU – Gilusad sa lokal nga pangagamhanan sa dakbayan sa Sugbo ang usa ka programa subay na sa pagsa-ulog sa ika 123rd National Flag Day sa pagpanguna sa Cultural and Historical Affairs Office (CHAO).
Gipahigayon ang flag raising ceremony sa Plaza Sugbo diin kabahin usab ang maong programa sa umaabot nga Philippine Independence Day sa Hunyo 12.
Giobserbar karong adlawa ang unang paggamit sa Philippine flag human ang kadaugan sa Philippine Revolutionary Army batok sa pwersa sa mga Espanyol atol sa Battle of Alapan sa Imus Cavite niadtong tuig 1898.
Niadtong Marso 6, 1965, giluwat ang Presidential Proclamation No. 374 ni kanhi Presidente Diosdado Macapagal nga nagdeklarar sa Mayo 28 isip National Flag Day. Human sa kapin duha ka semana o Marso 23, 1994 giisyu ang Executive Order No. 179 ni kanhi President Fidel V. Ramos alang sa paglugway sa selebrasyon sa National Flag Day gikan sa Mayo 28 ngadto na sa Hunyo 12 Independence Day, ang annual National Holiday sa Pilipinas agi ug paghandum sa kagawasan sa nasod gikan sa Espanya niadtong tuig 1898.
Giawhag ang tanang mga Filipino nga mag-display ug Philippine flag sa tanang mga pribado ug pampublikong opisina, ahensiya, business establishments, mga tunghaan ug pribadong panimalay sulod sa tibuok period.
Kini agi ug paghatag ug respeto sa simbolo sa National sovereignty ug solidarity. Nasayran na sa halos tanan nga ang flag sa usa ka nasod sama sa Philippine flag mao ang labing gi-ampingan nga simbolo sanglit kini ang timailhan sa kagawasan.
