CEBU – Daghan na usab ang nanggawas nga mga balita nga kabahin sa mga anomaliya sa pagpang-apod apod og ayuda ngadto sa mga biktima sa Bagyong Odette diin lakip na niini ang isyu sa P5k ug 5 ka kilo nga bugas nga gihatag sa dakbayan sa Sugbo ngadto sa iyahang mga konsituwente.
Aron makuhaan og habig alang sa patas nga pagsibya, eksklusibong gikahinabi sa Bombo Radyo Cebu si Cebu City Mayor Mike Rama aron makuha ang eksaktong tubag gikan sa hingtungdan.
Gibutyag ug giklaro ni Rama, nga walay kamatuoran ang balita nga dili mahatagan og 5 ka kilong bugas ang mga residente nga nakadawat na sa P5k nga ayuda.
Gitataw sa mayor nga bisan paman tuod dili tanan ang mahatagan sa P5k nga ayuda apan nihatag kini og kamandoan nga tanan ug walay pili ang mahatagan sa 5 ka kilong bugas ilabi na kadtong wala gayuy nadawat.
Gibutyag usab ni Rama, nga iyahang pa-imbestigaran ang mga nahitabong kakulian sa pagpang-apod apod sa ayuda gumikan dili kini makataronganon ilabi na nga panahon sa pagkuso-kuso sa bagyo wala kiniy gipili nga gub-on.
