CEBU – Kaso nga pagpangawat sa pundo sa barangay ang gisang-at nga kaso nila ni Celestino Pangatungan Jr. gikan sa Barangay Bankal ug Ruben Pangatungan nga taga Barangay Maribago.
Kini human nipasangil si Celestino kang ABC President ug Kapitan sa Barangay Bankal Eduardo Cuizon ngadto sa buhatan sa Ombudsman Visayas kalabot sa mga iregularidad nga pagpalit sa kapin P285,000 nga balor sa vitamins.
Samtang si Ruben miakusar kang Rosalino Abing nga Kapitan sa Barangay Maribago sa pagpalit og mga supply alang sa Covid-19 response sa tindahan nga One Ina shop nga mobalor ngadto sa P293,080 nga walay competitive bidding.
Ni-aligar si Celestino nga mihatag og pabor si Cuizon sa Rhice Trading bisan og dili kini kwalipikado.
Ang Rhice Trading usa ka supplier og school ug office supplies samtang ang laing duha ka bidder mao ang Ace Pharmacy ug R E Pharmaceuticals.
Gumikan walay nahitabong bidding sa pagpalit niining mga Vitamin C, giingong nakalapas kini sa Government Procurement Act or RA 9184, nga nagkinahanglan og competitive bidding alang sa tanang paliton sa barangay nga molapas sa P50,000.
Kini nga balaod nag-ingon nga ubos sa mga guidelines sa Government Policy Procurement Board (GPPB), tanang mga paliton ug mga presyo niini kinahanglan nga i-post sulod sa tulo ka adlaw diha sa PhilGEPs nga website o sa bisan asa nga makita nga mga lugar.
Kahinumduman nga sa milabayng adlaw, misang-at og kasong “Perjury” si Mayor Chan ug unom ka mga opisyal sa siyudad batok sa maong mga opisyal nga sila si Cuizon ug Abing kauban ni Gun-ob Barangay Captain Eleonor Fontanoza, Looc Barangay Captain Regina Ybañez, Tungasan Barangay Captain Triponia Abayan, Suba-basbas Barangay Captain, Joselito Tibon ug Canjulao Barangay Captain Reynaldo Tampus.
